MURUME anogara kwaChakonda, kwaMambo Bushu, kuShamva, akapona neburi retsono mushure mekurwisa nematsotsdi maviri ayo akamutema nedemo pamusoro peziso, ndokuzomutorera mari nenhare yake.
Mutevedzeri wemutauriri wemapurisa kudunhu reMashonaland Central, Segearnt Major Samuel Chikasha, vanoti mumhan’ari munyaya iyi ndiTrymore Kamuropa (35) wekwaSabhuku Madungwe, kwaMambo Bushu.
Vari kupomerwa mhosva yekumurwisa ndiTivaone Zete Jokonya, wekwaSabhuku Madungwe, nemumwewo murume asati ava kuzivikanwa zita rake.
“Nemusi wa28 Chikumi nenguva dza8 manheru, Trymore Kamuropa aibva kunzvimbo yemabhizimisi yeChakonda achienda kumba kwake apo akasangana nevarume vaviri ava pazambuko riri padyo nemusha wekwaMusariranwa. Vaviri ava vakabva vatanga kumurova nezvibhakera nembama uye mukurwisana uku, vakazomutema nedemo pamusoro peziso rekuruboshwe vachibva vamutorera nhare yake yerudzi rweItel neUS$250,” vanodaro Sgt Major Chikasha.
Mbavha idzi dzinonzi dzakasiya Kamuropa arere pasi achibuda ropa.
Sgt Major Chikasha vanoti Kamuropa akazovavarira kusimuka ndokufamba kuenda kumba kwake uko akanotaurira Grandson Makama wekwaSabhuku Madungwe uyo akazoenda kunozivisa mwanakomana waKamuropa, Ephraim Jangwa, wekwaSabhuku Murasiranwa zvainge zvaitika.
“Ephraim Jangwa akazoperekedza baba vake kumapurisa ekwaChakonda Police Base kunomhan’ara nyaya iyi. Mapurisa ari kuferefeta nyaya iyi apo varume vaviri ava vari kutsvagwa nekuda kwemhosva yekuba nekukuvadza munhu uyewo nekuedza kuponda,” vanodaro Sgt Major Chikasha.
Kamuropa akazoendeswa kuchipatara cheShamva aine ronda guru pamusoro peziso rekuruboshwe, akazvimba kumeso, akasvuuka mumusoro nekuruoko rwekuruboshwe.
“Trymore Kamuropa ari muchipatara umo ari kurapwa uye upenyu hwake huri pari nani. Zvinhu zvakabirwa murume uyu zvinokosha US$266,” vanodaro.
Sgt Major Chikasha vanoyambira veruzhinji kuti vasiyane netsika yekufamba voga husiku kunzvimbo dzakavandika.
